Prof. Dr. Shaban Memia
DREJTOR I PERGJITHSHEM

M i r ë s e v i n i !

Në cilësinë e Drejtorit të Përgjithshëm të ALUIZNI-t, përfitoj nga rasti tu uroj mirëseardhjen të gjithë vizitorëve të kësaj faqeje interneti, si dhe të inkurajoj interesimin e publikut të gjerë për të rejat e fundit që lidhen me procesin e legalizimeve dhe impaktin e tyre të drejtpërdrejtë në jetën sociale dhe ekonomike të vendit.

Duke qenë të vetëdijshëm se krijimi i marrëdhënieve transparente me grupet e interesit, mediat dhe publikun e gjerë, përbën një prej standarteve të domosdoshme për implementimin me sukses të reformës mbi pronësinë, jemi të bindur se zgjedhja jonë për krijimin dhe përditësimin e kësaj faqeje, kontribuon cilësisht në këtë drejtim.

Ideja e konceptimit dhe përditësimit të vazhdueshëm të faqes zyrtare të institucionit, ka në qendër të saj komunikimin interaktiv me opinionin publik të interesuar, duke shfrytëzuar instrumenta praktikë për kërkimin e të rejave të fundit, përzgjedhjen e kategorive të ndryshme të informacionit, paraqitjen reale të imazhit të institucionit, si dhe vizionit tonë mbi implementimin e procesit të legalizimeve.

Gjatë kërkimit virtual në rubrikat e faqes tonë, Ju do të njiheni nga afër me skemën e organizimit dhe funksionimit të ALUIZNI-t, prioritetet e aktivitetit institucional, informacione statistikore, si dhe me të rejat më të fundit mbi zhvillimet kryesore të procesit të legalizimeve, në kuadër të reformës mbi pronësinë, të iniciuar nga Qeveria Shqiptare.